أهــــــــــــــــــــــــــــــــلا رمضـــــــــــــــــــــــــــــــان

أهلا رمضان

ليلة الرؤية
ناس قاعدين خايفين بيقولوا يارب استر
وكأن الموت جاي هياخدهم
جابوا المفتي يقول الرؤية
قال بكرة فطار
فرحوا الخايبين قصدي الخايفين
وقالوا فليحيا المفتي
وعدى اليوم
وجه من بعده شهر الصوم
وعادات بالكوم
منها المحمود ،منها المذموم
هنفسرها ، وهنذكرها
من أول يوم فيه ناس بدأت تنفخ وتفش
م الصبح عليهم تكشيرة غيرت الوش
متمني قبل ما ييجي الشهر
بسرعة ويمش
وادي عمي أمين قبل المغرب برة الحارة
واقف ماسك ف ايده سيجارة
واتنين ف ودانه شمال ويمين
ويقول ردوا عليا يا صايمين
ليه كل دقيقة تعدي علينا
قبل المغرب زي سنين
بعد أذان المغرب فرفش
م التدخين صدره بيخرخش
مش راحم نفسه من الصنفين
وكأنه ماكلشي أو مشربشي
بقالو يومين
والمعدة اهي عبت واتكبست
وكأنها مجرمة واتحبست
ف قفص ضيق دخلوه ألفين
***
وشوية وبدأت التسابيح
في الجامع وصلاة التراويح
وإمام زي القطر بيجري
ويقول لو اخف راح ابقى مريح
د الناس طول اليوم تعبانة
لو اطوِّل هتكون غضبانة
ويعدي الشهر بسورة العصر
والناس مبسوطة وفرحانة
***
رمضان ياخوانا مهوش عادة
د تضرع ، تسبيح وعبادة
وسعادة مابعديها سعادة
في الجنة هناك منتظرانا
***
والتليفزيون عبى وحمل
والإرسال مبقاش بينمل
والناس دي ازاي راح تتحمل
وذنوبه كتير مش سايبانا
بنعدي نهارنا قدامه
وأسَرنا صبحنا خدامه
منفكرشي غير ف كلامه
وكلامه اهو ساكن جوانا
***
واهو عدى بسرعة وودعنا
متسيبه يروح،هو بتاعنا ؟
د تعبنا وجعنا وصدعنا
د كلام الناس الغفلانة
والناس تدَّاين وتحوش
وتحاول تجمع وتكوش
علشان عالعيد راح تتروش
بعد العيد م الدين تعبانة
***
وف نفس الوقت فيه ناس تانيين
بيقضوا الشهر عبادة ودين
والمصحف ف ايديهم ماسكين
دي صحيح الناس الكسبانة
أصل دي ناس منها تتعلم
وعليها كتير مش هتكلم
خليك كده نايم ومبلم
وكأنك مش من دنيانا
***
ف الآخر هختم ف كلامي
واحلف بالله قبل صيامي
وهقول بالشعر وبعلامي
وانصح ف الناس السكرانة
رمضان ياخوانا مهوش شيلة
ع القلب صعيبة و تقيلة
رمضان كله معاني جميلة
وياريتكم تعيشوها معانا
رمضان شهر الخير والبركة
رمضان مش للنوم ، للحركة
والمؤمن د ف رمضان سمكة
وبعيد عنه تبقى مهانة
الحقوا رمضان قبل ما يمشي
والعاقل هيفوق ماينامشي
والعاصي هيزيد مايخافشي
والمولى كريم قوي ويانا
وتحية كبيرة لشهر الصوم
طهر جوانا وبرانا