ســــــــــــــــــــــــــــــؤال وجـــــــــــــــــــــــــــــــواب

سؤال وجواب

هتسألني وظيفتك إيه؟
هقول شاعر

وهثبتلك وراح اقولك
كلام بيدق بمشاعر

وشعري يدوب شويه كئيب
قصيده بكا وواحده نحيب
وتسمعها نغمها عجيب
جميل أولها والآخر

وتضحك لأ وتتعجب
من الصبحيه للمغرب
عشان متربي متأدب
وشاعر زي مانا شاعر

ومواضيع منها بنعاني
صحيح وجعاك ووجعاني
وعزة نفسي مانعاني
أعيط واللا اروح جاعر

وتسألني بتكتب ليه ؟
أقول م الكبت والضيقه
ولو مره أكون مهموم
أو اشعر يوم بمضيقه
أقوم جايب قلم اسود
ووحدي ف ركن اروح اقعد
واسيب نفسي واطير وابعد
واحس بخطوتي جريئه

واقوم م النوم على صوتي
بيدعي بهلكتي وموتي
واحس براحه ف سكوتي
ف قلبي نار وحريقه

ولو كان د شعيري
لكنت علفت بيه حميري
وكنت نفعت بيه غيري
لكنه سراب ودي حقيقه

ولو كان شعري ده فولي
لكنت علفت بيه عجولي
وكنت اديك تبيعهولي
وافك الزنقه والضيقه

زمان الشعر عدى وراح
زمان بيرم وعمو صلاح
وصدقني عشان ترتاح
د كل فلاح بمشيئه