نفســــــــــــــــــــــــــــــــــــــــــي

نفسي

البلد دي تهمني
اللي فيها يخصني
اللي جارحها جارحني
واللي يسعدها هنايا
نفسي اشيل الهم عنها
وارمي احزانها ورايا
نفسي اقرا يوم تاريخها
واحكي من تاني الحكايه
واحكي ذكراها الجميله
م البدايه للنهايه
نفسي احضنها واجري
فين تروح والله مادري
المهم تكون معايا
البلد دي هيه امي
هيه اهلى هيه ناسي
البلد دي عرفتني
ف الصعاب ازاي اقاسي
البلد دي رضعتني
كبرتني علمتني
حسستني بالحنان
لو وحيد او وسط ناسي
البلد دي الحب هيه
هيه مفتاح السعاده
البلد دي الحب ليها
هو ركن م العباده
كل شبر من ترابها
لو بروحي اشتريه
كل واحد من شبابها
لو بعمري افتديه
نفسي اقدم ليها حاجه
قبل ما اكبر او اموت
نفسي ازرع ارضها
وادفن خيوط العنكبوت
نفسي اشوفها ليها رايه
تبقى مصباح الهدايه
تبقى للركب البدايه
واللي يبغي راح يموت