ابن خضــــــــــــــــــــــــــــــــــــــــــــــــــرة

ابن خضره

قومي اندبيني والبسي لاسود
يا خضره يا حنينه يام الدموع غاليه
أَصحى على صرختك مفزوع ومش داري:
شوف الدمار والخراب يا بو الهمم عاليه
شوف دمع خضره سيول حمرا تسيل تجرح
رد ابن خضره على خضره جواب يفرح :
ابكي يا خضره ومين يسمع ندا صوتك
ابنك حياته انتهت ومنيته سكوتك
ابنك د مات بالحيا ومنتظر موتك
ابكي كتير واصرخى مين يستمعلك مين؟

ابنك ضميره مات بعد اما كان يوم حي
والقلب منه اندفن صابه العفن والطي
والعقل منه غاب وسط الضباب والغي
سيبك ولا تدوَّري وتقولي ابني فين

ابنك يخاف يتكلم يقطعو لسانه
ابنك يخاف يسمع يملصو ودانه
ابنك يا خضره يخاف يبص قدامه
ويخاف يبص وراه وشماله واللا يمين

ابنك عنيه اتعمت مبقاش يشوف غيرهم
يسمع كلامهم ينفذ كل أوامرهم
ويبيع غاليه والرخيص من أجل خاطرهم
وكل ده واكتر وهما مش راضيين

خضره تشيل ف التراب وتحط فوق راسها
مين راح يشيل همها غير أهلها وناسها ؟
أقرب ما ليها ابنها تحت المداس داسها
وهما بيسقفو وشويه مبسوطين

خضره تشق الهدوم وتلطم الخدين
تبكي على حظها اللي انصبغ بالطين
تشكي إلى ربها وتفتكر حطين
وتقول صلاح راجع..راجع صلاح الدين

سمع ابن خضره الكلام كبَّر وطنشها
وعبَّى كل الشنط بالذل حبشها
وقال حياتنا جميله لازم بقى نعيشها
وانا بريئ من خضره حد يوم الدين

وسلمت خضره أمرها لله
وقالت ابني خلاص..دلوقت مش عايزاه
لو كنت ربيته .. مكانش ضل وتاه
واخواته راحو وراه وصارو ليه تابعين

بس ابن خضره الصُّغيَّر عالعزه متربي
حلف يبيع نفسه ودنيته يلبي
ندا الكرامه والشرف وجعبته يعبِّي
بالتقوى والإيمان والإلتزام والدين
وقف ف وش العدا ولا خوفه سلاحهم
قال متخافيش يامَّه اخواتي يوم راجعين