ديرمــــــــــــــــــــــــــــــــــــــــــواس

ديرمواس
في عيدك
إحنا جيناكي
بنتأسف
عشان احنا
نسيناكي
***
نسيناكي
نسينا تاريخنا
وياكي
وانا برضك واحد منا
وجاي اتعشة وياكي
وجاي قال ايه
انا الشاكي
وانا المفروض اكون باكي
عشان احنا
نسيناكي
***
وأصلي حنون
وعندي جنون
ودايما
اغني لولاكي
***
ودايما احن لترابك
واقف حيران على بابك
واقدم طاعتي لجنابك
وألقاكي
تسامحيني ، تضميني
تنسِّيني وتتحاكي
ومن كتر الحنان عندك
وانا في الحضن بنساكي
***
وأصلَك إيه ؟؟
كلام ممكن في يوم تقوليه
ومن حقك
كمان تعيديه
***
قليل الأصل في حبك
دانا المفروض اكون جنبك
أعيش حارس على قلبك
ليدخلو غيري ويحبك
وكنت قريب لقلبك يوم
لقيت الكل بيحبك
ونار الغيرة قتلتني
قعدت لوحدي ولقيتني
بلوم نفسي عشان غيري
مهوَّ اللي شايل همي
وأمه زي ماهي أمي
وماشيه ف دمه وف دمي
ويومها عرفت معنى الحب
اللي يشيل الضلام م القلب
ويطرد وحدته في القرب
وياخد شمعته م الرب
ينور بيها كل الدرب
***
وهرجع تاني وياكي
اهنيكي على شقاكي
على سهرك في مرساكي
بتستني اللي راحو بعيد
وشربو من حناياكي
يعودو يشربو تاني
يبوسو أرض مرساكي
يشيلو الراية أعلاكي
ويدعو باسم مولاكي
يصونك في النهار والليل
ويحميكي ويرعاكي