حسن محمود
عضو نشيط
عدد المساهمات : 88
تاريخ التسجيل : 08/05/2011
 |  موضوع: هــــــــــــــــــــــــــــــــى ( 2 )  الجمعة أبريل 27, 2012 1:46 am | |
| هي ( 2 )
حرام عليك
طب حتى خاف من ربنا
على طول كده
تفضل تسوق ف المسكنه
مع اني ياما قلتلك
دي مش أنا ؟
فتح عنيك شوف دنيتي
اتغيرت صبحت سواد
وانت بإيديك شتتني
وف لحظه ضيعت الوداد
فاكر زمان ؟؟؟
فاكر وعودك والكلام الحلو
والحب اللي كان ؟
فاكر حنانك اللي فاق كل الحنان ؟
فاكر الأمان ؟
فاكر حكايات الفرح
اللي انت ياما رسمتها
فوق الحيطان ؟
طب لسه فاكر لما مرة ندهتلك
جيتلى قوام وفرشتلى توبك ؟
ولمست شعري بالإيدين
ووعدتني يومها
وحلفت بيا ما تنسانيش
ف الشده وكروبك ؟
وحلفت إنك مهما كان
هتحطني ف قلبك
واتغطى بجفونك؟
وحلفت بعيونك
وحلفت انا أفضل معاك
ضميتني بجنونك
حسستني ان الحياة
زنزانه من دونك
وف لحظة قمت من المنام
ولقيتني مرمية
ولا لاقيه حضن يضمنى
ولا لاقية حنية
ولقيتني تايهة ف وحدتي
وانت بتتفرج
شايف عذابي ولوعتي
وبناري مكوية
بقى بعد كل الظلم ده
تطلب سماح منى ؟
مش ناسية انا مش جاهلة انا
د زماني علمني
كل المشاعر ناحيتك
راحت خلاص منى
مش عايزة تاني دنيتك
ابعد بعيد عني
ما تعيدش وتزيد ف الكلام
د خلاص ما عاد ينفع
حتى اللي باقى من الوداد
مش راضى ليك يشفع
سيبني اعاني ف دنيتي
وأعيشها م الأول
لكن هشوفك يوم اكيد
بترد وبتدفع
| |
|
