قـــــــــــــــــرفت منكم

قرفت منكم

قرفت والله

مبقتش متحمل

والشعر مني شاب

والجسم بينمل

طب لما كله قرف

مين بس هيكمل ؟

واسكت فى نفسي واقول

أهو بكرة تتعدل

قرفت والله

والصمت قاتلني

من جوة متقطع

يارب صبرني

والصبر مني زهق

والذل آسرني

مش قادر اتكلم

داللي محسرنى

قرفت والله

ومعدتش املك شيئ

والأهل تركوني

والكل منى برئ

لو حد يتكلم

راح يقطعو لسانه

والسجن والله عذاب

سجانه شخص بذئ

قرفت من ريحتي

عادت ما تنطاقشي

قالولي مش عاجبك

شوفلك مكان وامشي

هو انت ناقصك ايه ؟

عميان ما بتشوفشي

انت مالكش الشبع

اصلك ما بتوبشي

فكرت أتكلم

شفت العذاب ألوان

شالوا الهدوم عني

وشالوا جلدي كمان

وعلمونى الأدب

اللي نسيته زمان

ميت بقيت بالحيا

وقلت انا ندمان

وفضلت صابر ع اللي مكتوبلى

واللي بيعرف عدد ييجي ويحسبلى

معرفش شرق وغرب

ولا بحري من قبلي

وناس كتير زيي

ولا حد قربلي

حصدو اللى انا زارعه

وسابونى بمراري

وعشت عمري جبان

مسروق وانا داري

والكل كان مسروق

والكل بيداري

وشربونا السم

وياريته كان هاري

وعصابة كانت هناك

فى بلدنا بتحوش

وبينهم اتقسمت

واللى لحق كوش

وبيبعولنا الهوا

وعمينا بنلوش

وكان فقيرنا جعان

والكلب متروش

واتفك منا اللجام

والخوف هرب لبعيد

زارتنا ثورة غضب

يومها د كان يوم عيد

ودسنا فوق الرقاب

والكل عزمه شديد

ولا سبنا على بابا

ولا سبنا عز حديد

والصبر ياهل البلد

الحال هيتعدل

والعزة راح ترجع

والسوء هيتبدل

خلاص مفيش طغيان

ولا حد يتبهدل

اوعاك تنخ ف يوم

اياك ف يوم تنزل

رب العباد حررك

ولعرشهم زلزل