جاي اسلم
جاي اقولك
الف ميت حمد الله واكتر
ع السلامة
فرحانين احنا بقدومك
وبزيارتك لينا هلت
ع الوشوش احلى ابتسامه
مش هنافق
مش هقولك
واللا اعيدلك
ياللي كنت وكنت ياما
لو أراد المولى ليك
خلي بالك م الغلابة
اللي متاكلة حقوقهم
واللي مليانين طيابة
خلي سيف الحق عالي
وارفعه ف وش الديابة
واستعين بالله عليهم
ماحنا مش عايشين ف غابه
خلي بالك دي أمانه
ربي هيحاسبك عليها
لو تصونها ف نني عينك
هو هيعينك عليها
وتلاقينا معاك ف صفك
والقلوب تبقى ماليها
أما لو وزك شيطانك
ع الميدان فورا نروح
راح تسيب يومها مكانك
مهما هتكون الجروح
اوع تزعل بس مني
أصلي تعبان م اللي دقته
وانت عارف برضو زيي
وات زيي برضو شفته
ضهرنا اتكسَّر وعودنا
علمت فيه السنين
حتى صوتنا التاني راح
م البكى وكتر الأنين
محتاجين عدل وكرامة
محتاجين نعرف نعيش
محتاجين ريس يصونا
يحس بينا
يخاف علينا
ع العصابه يكون شويش
نسأله معاك كام ياريس
الإجابة تكون معيش
نسأله معاك كام يا ريس
بالأمانة يقول
مفيش
موضوع: رساله الى حمدين الصباحي 
الأربعاء فبراير 29, 2012 6:30 pm