اللغـــــــــــــــــــــــــــــــــــز

اللغز

كنت الأول
تتكلم كان صوتك عالي
ف مكان مليان أو كان خالي
كان الحق مخاوي لسانك
وكأنك مخلوق علشانه
وكأنه مخلوق علشانك

كنت أشوفك
أتهز وتهرب أنفاسي
كنت كمان ع الظالم قاسي
للمظلوم أبدا مش ناسي
وتقول أهلي وتقول ناسي
ولا يوم ناسي

كنت بتسهر
للصبح دموعك ما تجفش
من أوجاعك
وتقول للمتباع مين باعك
ف الكون متشرد ولا ساعك

على طول ازاي و ف ظرف يومين
أهو بدأ الصوت يوطى ويوطى
ومحدش بقى سامع صوتك
والكل اتعجب لسكوتك

قلت أكيد شده وهتعدي
والصبر كتير خالص عندي
مستني ف يوم ترجع تاني
تصرخ تملا الدنيا أغاني
ويا أماني

لا سمعت ياخوي صوتك جاني
واللا أماني واللا أغاني

قلت خلاص راح اسد مكانه
هكتب شعر يهز كيانه
ويرجع قلبه لأحزانه

وكتبت الشعر بطول الدهر
وبدأت وكان الصوت عالي
وفضلت أقول اللي ف بالي
سمع الأبيات عمي وخالي
وجيراني كمان اللي قبالي
وابو بال مشغول وابو بال خالي
قالو د مجنون
بيقول الشعر منين ما يكون
وعاملي شجاع وعاملي حنون
والمليم عمره عليه ما يهون

وكلامهم كان بالحرف صحيح
كان حق وصدق مهوش تجريح
أنا أصلى تملى لساني فصيح
لكن قلبي ميت مدفون

وبدأت اتردد ف كلامي
والألوان تغمق قدامي
وكمان الصوت يوطى ويوطى
ومحدش بقى سامع صوتي
والكل اتعجب لسكوتي
ناس منهم كانت بتهدي
قالو أكيد شده وهتعدي
مستنيين ارجع تاني
أصرخ أملا الدنيا أغاني
ويا أماني

شدو ايديهم عملو مظاهره
لازم ترجع أرضنا حره
عروبتنا دي عليها مؤامرة
عايزين ناس تهتف وتردد
يفضل صوتهم دايما عالي

وصلت عربيات الشرطه
والمتظاهرين صبحو ف ورطه
ف دقيقه خلاص دخلو بيوتهم
واهو بدأ الصوت يوطى ويوطى
ومحدش بقى سامع صوتهم
والكون يتعجب لسكوتهم
طب فين قوتهم جبروتهم
آه يا خيبتهم

بعد ما صرخ الكون واتعجب
وفضل فيهم يشتم يشجب
خاف احسن حد يكون سامعه
بكى نزل الدم مكان دمعه
قال همَّا أكيد راح يجتمعو

واتغير لونه وتفكيره
واهو بدأ الصوت يوطى ويوطى
وانا بسأل وما عندى إجابه
مين اللي هيسأل عن صوته؟
مين راح يتعجب لسكوته ؟

والصوت ف سؤالي بدأ عالي
بعديها بدأ يوطى ويوطى
حد ما راح الصوت واتغطى
م الكون كله