عايز اتجوز

خلصت الجامعة
وأخدت الليسانس كمان
في الإنجليزي
بقيت ارطن بنص لسان
تقول صباح الخير
أرد جود مور نينج
تبحلقلي
أقولك بي أجنتلمان
واقول لنفسي
آن الأوان بقى اتجوز
د سني كبير
وبالتأخير راح اعنس
وافكر كيف
والمصاريف اجيبها منين
وقلت انوي
وربك يومها هيجهز
ورحت لبنت
كان بيتهم في جنبيا
وأحلى كلام
إنها واخدة كلية
بقصر كلام
سألني أبوها وياك كام
شخلل جيوبك
د بنتي زينة وصبية
ومهر كبير
وانا ف بيتي بابور بالجاز
عشان ادفع
راح اطلب شركا ست اجواز
وبادعي واقول
منك يابعيد لله
د لو صايم
عشر سنوات مجيبش جهاز
****
ورحت لواحدة
كانت لسه ف الدبلوم
وعاملة رجيم
ولابة اللبس نه هدوم
وقدامي
وحاطة الرجل فوق الرجل
لا خجلانة
أروح واجي ولا بتقوم
وقلت مسيرها
بعد جوازنا تتعدل
ورايحة وجاية
قدامي بتتحنجل
وبالألوان
مع الفستان تتمشى
وباين والله
عمرها ما هتتخجل
واروح النادي
الاقي الست بتكركع
خمس شبان
ووياهم بتتلكع
ووياهم
زبادي وطرشى وطحينة
وخدت قرار
بإني أسيبها يوم واخلع
****
وقلت مفيش
غير البنت فلاحة
دي وياها
هتبقى العيشة مرتاحة
هتخدمني
وتكرمني وتسعدني
وهتقول جوزي
ومفيش غيره في الساحة
وشافت روحها
حلوة عشان مرحتلها
وتدلل
عليا مقادر اخذلها
وسيرتي يا ناس
في وسط الناس بتتبعتر
وخليتها
تروح لحالها وسبيلها
وقلت ياناس
كفاية حرام بلاها جواز
وقررت
اني مع نفسي أكون أستاذ
أعلم
في البلد أطفال واربيهم
د أحسنلي
من التبذير والاستفزاز