رحلة طويلة
عربية وقطر وطيارة
وانا مش عارف رايح فين
صح انا عارف بلد الرحلة
لكن ازاي حالها حياتي ؟
صبرك ...صبرك
بكرة هتعرف
وإجابة لسؤال واتنين
*****
ووصلت مكان ومكانه غرييييب
والجو كئيييب
ومبعرف حد
والدنيا بدأت تخبطني وتخبَّطني
ياني يا بطني بين سبت وحد
جربت مرار وعرفت الجوع
واهو فات أسبوع وانا ابات في البرد
ولا عارف حد يلملمني ويغطيني
ولا لاقي حضن يدفيني
فينك يامَّه ؟فينك فيني
ياللي انتي حنانك ملهوش حد
ذنبك إنك علمتيني أعيش ف حنانك
بين أحضانك
لعرف جوع ولا أعرف برد
وانا سبتك يامه وسبتيني ؟
وهجرتك واللا هجرتيني
بتدمع عيني
دمع ما يتعد
والغربة صعبة الغربة مرار
الغربة دي نار
وحكمة وقالها حكيم يعرف
لكلامه يختار
اعرف ف كل بلد صاحب
يبقالك دار
تلف وتميل عنده
وتبات وتاكل من قده
وساعتها راح تعرف قيمته
من غير ما هتقدم أعذار
راح يفتحلك
بابه يقولك
أهلاً في الدار
*******
نرجع نكمل رحلتنا
ونحكي تاني ف حكايتنا
أيام خدتنا وجابتنا
وما ودتنا ولا ودتنا
للبيت نبات بين حضن الأم
هم ما يتلم
ويدوب بدأنا ندوق الراحة نحس النوم
ويدوب بدأنا نكون بيت يبقالنا هدوم
واشتاقتلها
وانا كنت مشتاق من بدري
وبحنلها وبغنلها
وبقول بااااااااااارب تعدلها
علشان أروق وأكلمها وأطمنها
في الآخر ربنا عدلها
سنة وشهرين
عذاب وآلام وجروح ومرار
ورفعت سماعة التليفون
وطلبت نمرة بيتنا كمان
اتنين ستة تلاتة تمانية
خمسة وعشرين
وجرس بيضرب واسرع منه
بيضرب قلبي بين الجنبين
رفع السماعة شخص كأنه
عجل سمين
رد وقاللي وصوته تخين
ألوووووو مييييييين
إيه الغباء ده اللي انا فيه؟
النمرة غلط؟واللا حصل إيه
حطيت السماعة مكانها
وقعدت مركِّز في التليفون
وطلبت النمرة ومتأكد إنها هيه
رن التليفون
تفتكروا مين رد عليا ؟
نفس المجنون
قال ليلتك سودة ومش فايته
أنا آسف ..لحظة ياوالدنا
مش ده بيت الست تحية
قال أيوة هوَّ ياعنية
وانا جوزها هريدي
نهار إسود
أمي اتجنت ؟
تتجوز كيف لما أبويا لسة مماتشي؟
قاللي أبوك مات
والعدة كملت واتوفت
واتجوزت امك واتعفت
بعد ماشردها وبهدلها
وكان قارف أهلها وذاللها
وانا ازاي بس يا ربي ؟
لازم ده ذنبي.. ومش ذنبي
إني أشوف لقمة عيش اكلها
أنا لازم اروح دلوقتي
وأضم أخويا كمان واختي
واندب أمي ولا يوم هبكي
من تاني عليا ولا عليها
ياخواتي عقلي طار مني
تفكيري كمان هيجنني
وف شنطة سودة....أو بني
لملمت هدومي وبسرعة
باتمنى لو اطير وأروح
قلبي بيبكي ..عنيا تنوح
وفجأة.....
********
فجأة صحيت م النوم ولقتني
نايم جوة البيت واتاريني
بحلم بكابوس هيموتني
واتاريني لا سافرت يا ناس
ولا عندنا تليفون بالمرة
وجريت ناحية اوضة النوم
ولقيت أمي نايمة وصاحية
جنبيها الأطفال بالكوم
وهدوم متبهدلة مرمية
قلت الحمد لله ياخواتي
رحت شربت بلعة مية
قلتلها دانا شفت كابوس
قالت خير
قلتلها خلاص
شدة وعدت ورياح هدِّت
عقلي وعاود تاني للراس
لسة وياما نشوف كوابيس
لكن غيرك يامه مليش
لما انا عاطل قام كان حلمي
إني مسافر علشان اعيش
أكسب مال وأربي اخواتي
واتجوز وأكون ريش
لكن ده مش ممكن يحصل
علشان حلم الجوعان ...
عيش ...
موضوع: حلم الجعان 
الأحد مايو 08, 2011 1:10 am
