وعـــــــــــــــــــــــــــــــــــــــــــد

مش هزعل تاني قلبك
مش هقولك كلمة تجرح
كل همي م النهارده
ان قلبك تاني يفرح
وان ايامك تخضر
تتملي فرحه وسعاده
تتملي اغصان جميله
طيرها يكتر كل ماده
مش هزعل تاني قلبك
مش راح احلف باليمين
لما قلبك مني يزعل
يبقى يفرح بس مين
دانت ساكن نبض قلبي
جوة مني فى العروق
وانت كل الناس دي عندي
وانت لحياتي الشروق
وانت مش هقدر اقولك
انت ايه بالنسبه ليا
انت فوق الكل ساكن
انت حاجه مش عاديه
نفسي يوم قلبي يجيلك
واقبله مني هديه
وابقي دوَّر جوه منه
حاجه واحده ساكنه هيه
هيه انت وانت بس
ياللي بحنانك بحس
ياللي فى غيابك بخس
مد ايدك امسك ايدي
واختبرلي النبض جس
راح تلاقى ف نبضي انت
راح تلاقى كل حته
شكلها من شكلك انت
ياللي ساكن كلى انت
ياللي مالك كلي انت
مش هزعل تاني نفسي
اصل نفسي هيه انت
والسماح انا طالبه منك
خلي قلبي يومها يفرح
كل همي م النهارده
ان قلبك بس يفرح
وابتسامتك فوق خدودك
نفسي اشوفها كل يوم
نفسي اشوفك كل لحظه
وانتي خالي م الهموم
يومها أصلب ضهري تاني
واقدر اتحرك واقوم
وامشي واجي لحد عندك
واعترفلك بالوداد
واعتذرلك عاللي فات
واوعدك ما ف يوم هتزعل
او هقولك كلمه تجرح
يبقى يومها كل همي
ان قلبك بس يفرح