امتى هترجع ؟؟

امتى هترجع تاخد إيدي
ويرجع عيدي
وابقى معاك ؟

امتى هترجع علشان قلبي
يرجع يفرح
يوم بلقاك ؟

ارجع ياللي غيابك طول
قول م الأول
أحلى كلام

اسمع تاني لدقة قلبي
دانا من حبي
عشت آلام

عشت آلام ف غيابك صعبة
حاسس غربة
وقلبي وحيد

بدعي كتير تتفك الكربة
وافرح تاني
وابقى سعيد

انا جربت النار ف بعادك
دقت عذاب
ومرار وصديد

لما بتبعد بعرف إني
من غير قلبك
حزني شديد

كل منايا لما هترجع
تقدر تمسح
كل آهات

كل آهات عشتها ف غيابك
ياللي جنابك
عدى وفات

عدي وفات ساكن فوق قلبي
ونوَّر عمري
بحبه ملاه

لو هتسيبني هرجع اطلب
واشحت منك
اقول لله

وانت يا غالي تحن عليا
وترحم ضعفى
وتبقى قريب

وانا متأكد م اللي بقوله
أصلك عندي
أغلى حبيب

وامتى هترجع تاخد ايدي
ويرجع عيدي
وانا وياك ؟

امتى هترجع علشان قلبي
يرجع يفرح
يوم بلقاك ؟

اسمع كلمة معاك خليها
قلبي يا عمري
بيتمناك

مهما تغيب عنه وتطول
يفضل صابر
يستناك