الحقــــــــــــــــــــــــــــــــــــــــــــوني

الحقوني

الحقو ابن الصعيد
شعره وياه راح يموت
الحقوه وبسرعة ياللا
طلعوه من التابوت
ايوة شعره حقيقي لسه
طالع بينبِّت جديد
بس احساسه مشعشع
والكلام ده أكيد أكيد

الحقوا ابن الصعيد

الحقوه يدعيلكو دايماً
بالسعاده والكمال
اصل طول ماهو ف تابوته
مستحيل يرتاحله بال
كل يوم بيحكِّي شعره
للكبار ويَّا العيال
بس بيروَّح في بيته
بالمرار غير الصديد

الحقوا ابن الصعيد

عبد الرحمن فين يشوفه
حتى يسمع منه بيت
لو يسقف او يبوز
او يقوله منين ماجيت
ياللا وارجع خش بيتك
كان يوم اسود يوم ماجيت
مش هيزعل أو يكشر
اصله غلبان مش عنيد

الحقوني ابن الصعيد

نمت ليله شفت بيرم
جاي يخبَّط عالببان
قمت أفتح قاللي ياللا
هاتلي لقمة قوام جعان
رحت جبتلُُه قصيدة
كنت كاتبها زمان
قام سمعها وراح مهلل
قال بصوت عالي وشديد

الحقوا ابن الصعيد

قمت يومها فرحت خالص
ولصحابي كمان حكيت
قالو شد البطانية
تحت جنبك واستميت
آدي ليله شفت بيرم
مش بعيد بكرة جويد
جيت صرخت بأعلى صوتي
اللي عمال فيه أعيد

الحقوا ابن الصعيد

ابنكم هيعيش في طوعكم
بس بالله تلحقوه
علموه ازاي يعبر
لو مغبر نضفوه
حطو ايدكم ويا ايده
من مكانه اسحبوه
وان عجبكو ف يوم كلامه
راح يسمعكوا المزيد

انجدوا ابن الصعيد