في حب مدرسة بني سالم الاعدادية

فى حب مدرسة بني سالم

يامدرستنا
يا أحلى وأغلى من بيتنا
جميلك راح يكون دايما
سلف على دين ف رقبتنا
وياللي ف قلبي ليكي مكان
كبير جدا
انا اتعلمت فيكي زمان
كتير جدا

وحبك عاش ف قلبي كبير
لطلبه اساتذه ويا مدير
وعامل فيكي واللا غفير
على بابك
بقولك كلنا احبابك
يا مدينتنا

وعايز احكي حكاوي كتير
ياريت تكفي
تعرَّف اللي يسمعها
ويقراها ويفهمها
مدي الإخلاص
تخليه ويا نفسه يقول
دول أحسن ناس
تصحى ف قلبه وجوارحه
وبين الناس
ضميره النايم النعسان
يحس يقول انا انسان

ومش انسان لو انسى ف يوم
جميلكم اقابله بالنكران

ونفسي ارجعلها تاني
أبوس أرضى اللي وحشاني
وهتعيشي ف وجداني
لحد ما اموت

وهفضل طول مانا عايش
أعيد اسمك بأعلى الصوت
وهفتكرك ف أشعاري
ف كل سكوت

ودعوة حب من عاشق
لكل الناس بنين وبنات
تعالو نحب أركانها
وجدرانها وحتى السور
تعالو نحب ملعبها
وعلمها
مع الطبشور

تعالو نحب أستاذنا
وأبلتنا وزمايلنا
تعالو نحب نتعلم
حاجه تفيدنا تكبرنا
تقوي عقولنا أفكارنا
تفهمنا ...تنورنا

تعالو نفتكر إخواتنا قبلينا
ليهم أسماء بنسمعها
تشرفنا ...تعلينا

وليهم ما نكونش زييهم فينا الدكتور
فينا مهندس فينا الطيار
وفينا العالم المشهور

ولو لفينا وكبرنا ياريت يومها
ما ننساش حبنا الأول
ولا ضمايرنا تتحول
ولا ننكر ف يوم خيرها
من الآخر وف الأول
وندعيلها ونديها
ونشرف كمان بيها
ودي الأم اللي ربتنا
مدينتنا وساحتنا
وبيتنا وأحلى من بيتنا
يا مدرستنا

» محمد حسنين هيكل ،، مبارك وزمانه مـن المنصة إلى الميدان (الحلقة الثانية عشرة) .. حسين سالم !!