أمنيـــــــــــــــــــــــــــــــــــــــــــــــــــــــــــــــــــه

أمنيه

بتمناك ترجعلى وبدعي ف الليل ويا نهار
ييجي السعد وتيجي الفرحه وتملا عليا الدار
يفرح بيتنا ويفرح بيتكم كله كبار وصغار
د احنا ما قادرين نشبع منكم آدي سنين وسنين

تبقى قريب مني ف جنبي وفوق القلب هناك
قاعد متربع مفتوحلك ولا مليون شباك
مالك قلبي وآسر حبي وولادك وياك
ترحم شوقى وتجبر خاطري وتشيل دمع العين

ييجي محمد ماسك أحمد ومعاهم محمود
ورحاب جايه كمان وياهم والباب مش مردود
نقعد على طبليه وناكل حتى المش بدود
احنا مدام ربنا جمعنا نبقى خلاص شاكرين

نحكي على الأيام الخاليه ونقول ياما زمان
شفنا تعب وعذاب وارتحنا ونتمنى النسيان
أصل تعبنا د فرض علينا ودي حياة الإنسان
ياللا خلاص اهي شده وعدت ونعيش لينا يومين