خـــــــــــــــــــــــــــــــواطر عـــــــــــــــــــــــــــامل

خواطر عامل

ليه بتجافوني وانا شاري محبتكم
ليه بتبيعوني وانا اتونس بقربتكم
ليه بتهينوني وانا حافظ كرامتكم
ليه تجرحوني كده؟
الله يسامحكم !

جوه الفلل تسكنو وانا اللي اروقها
وللببان تقفلو وانا اللي علقها
بين الحيطان ترقدو بإيدي مذوقها
واتمنى صبر وجلد
والصحه واخدمكم

انتو بتتمنظرو وتقولو ده عبدنا
وانا اللي اقول سيدنا والست دي ستنا
ومتسألوش عني وقت التعب والضنى
ولو صحيح تعرفو
العبد ده سيدكم

ليه تكرهوني وانا اللي قدركم عليت ؟
ليه تنكروني وانا مصدر عمار البيت؟
وتشتموني وما جيتشي ف يوم رديت
واتمنى من ربنا
عني يحاسبكم