انفلــــــــــــــــــــــــــــــــــــــــونزا الطيور

انفلونزا الطيور

يخرب بيت البرد ويخرب بيت كل الأمراض
اللي بتيجي وتظهر فجأة واللي تجيب أعراض

انفلونزا ف بطه ووزة وما خلتش حمام
حتى أبو القردان وصلتله وصلت حتى يمام
كل الناس ما بقتش بتاكل ومهيش عارفه تنام
يخرب بيت البرد ويخرب بيت كل الأمراض

صاحب المزرعه يبكي ويندب طب راح يعمل ايه
الفرخة اللي تمنها بمبلغ خلو تمنها جنيه
واللي واخدها خايف منها وخايف ع الأولاد
يخرب بيت البرد ويخرب بيت كل الأمراض

واللحمه اللي كانت بتعفن صبحت شيئ مطلوب
غلو تمنها وخلو الدنيا تمشي بالمقلوب
واللي فقير مش لاقي تمنها صار إنسان عضاض
يخرب بيت البرد ويخرب بيت كل الأمراض

والصياد فرحان ومزغطط راسي على الموضوع
والناس لو مش تاخد منه هيموتو من الجوع
علَّى السعر وسب الفرخه وخوض ف الأعراض
يخرب بيت البرد ويخرب بيت كل الأمراض

والأخبار ف الراديو اتذاعت وكمان ف الجورنال
وصلت كل الناس ستات ورجال وكبار وعيال
والكل بيحكي وبيألف وبيوصف أعراض
يخرب بيت البرد ويخرب بيت كل الأمراض

يوم والتاني وقالو دي كارثة وكل الناس بتموت
ف محافظات مصر البحريه وف المنيا وأسيوط
واللي تجيله نزلة برد يقولو عليه إشاعات
يخرب بيت البرد ويخرب بيت كل الأمراض

أصدرو فورا أمر حكومي "إعدام كل الطير "
لو محبوس أو لو سايبينه بره البيت بيطير
والجمهور سلم وموافق ومعندوش إعراض
يخرب بيت البرد ويخرب بيت كل الأمراض

ياولاد ليه الشرك وليه بس نسيب شرع الله
د اللي ف يوم هيموت مكتوبله ولازم راح يلقاه
عيشو حياتكم واقتلو خوفكم وكفايه استعباط
يخرب بيت البرد ويخرب بيت كل الأمراض
اللي بتيجي وتظهر فجأة واللي تجيب أعراض