ســــــــــــــــــــــــــــــــــــــامحيني

سامحيني

فى يوم عيدك
أنا جتلك أبوس إيدك
واهنيكي

وأدعى ربنا يزيدك
كمان ميت عيد على عيدك
يخليكي

يابحر من الحنان فايض
حنان زايد
على الشطين

يا حب كبير ومش ممكن
فى يوم زيه
تشوف العين

طفولتي تعبتي ليل ونهار
ضعيف يبقى الدليل محتار
شربتي عذاب كتير ومرار
وتدعى المولى يشفيني

جميلك يامَّه فوق راسي
ياغاليه زي نور عيني

شبابي برضو تراعيني
أمان وحنان تزيديني
وفوق طاقتك بتديني
وتتمني تشوفيني
سعيد وقريب وجنبيكي
يا أمي ازاي اوافيكي ؟

فى يوم عيدك
أنا جتلك أبوس إيدك
أهنيكي

وسامحيني

وسامحيني عشان يامه
ف وسط الصحبه واللمه
ولما ابقي على القمه
ساعتها ببقى ناسيكي

وسامحيني

وسامحيني لتقصيري
وبُعدي كمان أنا وغيري
ومهما يجيني من خيري
د خيرك يسعى ويجيكي

ومهما ابعد
فى يوم عيدك
هجيلك لجل ابوس إيدك
واهنيكي

وهدعي المولى يديكي
جزاء اضعاف ما يوفيكي
ويغفرلك يخليكي
تطولى الجنه بإيديكي