شهــــــــــــــــــــــــادة ميـــــــــــــــــــــــــــــــــــلاد

شهادة ميلاد

دي قصة هقولها وحكايه
هتفضل عايشه جوايا
وافوض فيها شكوايا
لربنا رب العباد

حكايتي وحكايتك
وناس مالها آخر
أساس مشكلتها
شهادة ميلاد

ومن غير ما تحسب
فى يوم أو تفكر
طالعلك مصيبه
ومن غير ميعاد

وتجري وتمشي
وتبلص وترشي
تضيع ماليه
تهد اقتصاد

وحتة موظف ما يسواش ريال
بعرقي وعرقك يربي العيال
وببرود يقولك يا إبن الحلال
يا تبرز يا إما تدور فى لبلاد

ولا يقول بنيَّه ولا يقول عجوز
ولو طال رقبتك عليك راح يدوس
وجزار بيدبح و د سلاحه موس
ولا يخاف حكومه ولا يوم ميعاد

وحال البشر ف المكان ده حكايه
وكله بيجري عشان النهايه
ف لحظه يا عيني رجع للبدايه
عشان اسم أمه طلع اسم واد

تلاقى المشاكل ومالهاش حلول
ولا حد جنبك لهمك يعول
وتدعى وتطلب ف مرة القبول
وورقك هيرجع ف نفس الميعاد

يارب الغلابه كبار أو صغار
تخلص بلدنا من الاحتكار
تسلط عليهم بَلا مستطار
وتكتب عذابنا ما بينهم جهاد