حلم قصير ( الراجل ومراته )

حلم قصير
( الراجل ومراته )

المره:
صباح الخير يا زوجي
لعلك حلو وبصحه
يارب تكون كدا فايق
ايديك عالمحفضه افتحها
وعِدلي فلوس وادي
وركز ياللا بحبحها

الراجل :
صباحك زفت ومنيل
ياريتني ما قمت من نومي
ياريتك غورتي ف مصيبه
قرصتي قبل ما تقومي
مفيش عندك غير اديني
اقطع نفسي وهدومي؟؟

المره :
وانا اعمل ايه مع عيالك
والبي ازاي ف طلباتهم
اهج يا خويا ف الدنيا
ولا احرقهم واموتهم ؟
طب انت ازاي تخلفهم
وجاي دلوقت هتفوتهم؟؟

الراجل :
انا اسف يا سيدتي
قوليلي كل طلباتك
وقولي كام فلوس عايزه
ياريت الرحمه وحياتك
يإما اديكي بالجزمة
تروحى وسط إخواتك

المره :
د أصلا كان قدوم الشوم
يوم ما دخلت على دارنا
وخدنا فيك اكيد زمبه
محدش جه وحذرنا
هتفضل تنكر النعمه
لحد ف يوم ما تخسرنا

الراجل :
إلهي يا رب غفرانك
غفلت بعدت سبحانك
فرجِّع عقلى في راسي
وذكرني بسلطانك
ووسع صدري صبرني
وأبعد عني شيطانك

وقام من نومه متنكد
وشايل الدنيا على راسه
ويستغفر ويسترجع
ويتشكك ف إخلاصه
طب ازاي بس أشتمها
وتشتمني وجاب فاسه
طلع عالغيط وشاف شغله
وخد م الحلم أنفاسه
وروح بيته حكاها
باست رجله وباست راسه
وهو كمان مقدرها
وعرفها بإحساسه