ما يهمكشـــــــــــــــــي

ما يهمكشي

لو متعصب أو متضايق
اشرب شيشه
لو مبسوط ومزاجك رايق
اشرب شيشه
لو محتار أو دمك فاير
اشرب شيشه ويا سجاير
لو ناوي وللناس هتعاير
قوم خدلك حتة تحشيشه
بالشيشه ويا التحشيشه
ودماغ هتعيش أحسن عيشه
ما يهمكشي يا سيدنا البيه
الشيشه راح تعمل ايه
ما يهمكشي نفس متعكر
أو حتى صحه بتدهور
أو حاله تسوء أكتر واكتر
واللا بقيت مش قادر تمشي
ما يهمكشي
ما يهمكشي رئتك سوده
واللا علاج صنفين ف العوده
والعافيه خلاص مش موجوده
وخرست وما بتتكلمشي
ما يهمكشي
ما يهمكشي امراض ملعونه
ناس حوليك قاعده ومجنونه
ناس بتجهزلك ف معونه
وعلاجك اصبح ما يفيدشي
ما يهمكشي
ما يهمكشي معايش سوده
حتى الموته دي أسوأ موته
رحت وسبت وراك م الكوته
يشرب منها اللي ما شربشي
وما تطنشي
ما تطنشي يا صاحب الكيف
ما تقولشي راح ابطل كيف؟؟
انت عرفت نتيجة الكيف
اسمع منى وما تطنشي
سيبك م الشيشه ومن غيرها
والصحه دى كمان قدرها
دالمولى أكيد سائلك عنها
كيف هتجاوب ؟
ما تنحشي
اللي انا قلته قليِّل جدا
عارفينه أبا عن جدا
بس هل احنا ف مالطه بندن
واللي هيسمع ما يكبرشي؟
احنا يا ناس قلنا اللي علينا
وبندعى المولى يهدينا
يهدي الناس دولا على ايدينا
أحسن ما يقولو ما بلغشي
أنا بلغت اللهم اشهد
وسمعني بطرس وسي أحمد
وهقول وهعيد مش راح أزهد
وان ما سمعتش
ما يهمكشي