مهــــــــــــــــــــــــــــــــــــران

مهران

مهران مش غاوي علام ومكبر راسه كمان ياولاد
وتقوله ذاكرلك كلمة يطنش ويقضيها عناد
ومحصلش الواد حمدي واللا البنت هناء وسعاد
وبدال الملحق واحد واخد خمسة فوق العشرين
*******
ومشاكل مبتتعدش ف المعهد ويا الأستاذ
وشتيمة وقلة قيمة وساقط ف ملف الإنجاز
ويقول عايزين تعسيلة على القهوة ياللا يامعاذ
واهو طلعو وسابو المعهد وانحرفو هما الاتنين
*******

ع القهوة يقولو كلام وحديت ميشرفش الإسلام
وكمان لابسين العمة طب بالذمة د يبقى كلام ؟
ويعاكسو حريم وبنات ماشيين ف الشارع يرمو ملام
ع العلم وأهل العلم وللأزهر وكمان عالدين
*******
ف الفصل صاحبنا مكوع يضحك ويألف حكايات
تريقة ع الأستاذ مرة ومرة يقول لزميله نكات
وياه لا تلاقي قلم ولاحتى كتب، ولا حتى سكات؟
وتشوفه تقول عربجي ،لأ دالعربجي راجل مسكين
*******
ف الإمتحانات تلاقيه مذلول وتبصله ملوش وش
كتب الأسئلة زي ما هية وقاعد مستني الغش
لو واحد شد على اللجنة تلاقيه ينفخ ويفش
يتنمرد حوليه ويدور على نقطة أو سؤالين
*******
منكم لله شوهتونا وأسأتو إلى التعليم
والله خسارة فيكو اللقمة وخسارة فيكو المليم
وانا بادعي يارب اصلح حالنا دانت اللي بحالنا عليم
واتمنى ف يوم يبقى الأزهر صورة وجوهر للدين