عِشرة الحشرات

عِشرة الحشرات
براغيت وناموس والنمل كمان
وياهم ليا ماعادش مكان
لو عايز انام ..............
.............مانتاش نعسان
لو عايز اقعد وحدي مرتاح
الهرش ف جنبي وف راسي
من غير تفصيل د ف كل مكان
***
أمراض بالكوم جاياني يا ناس
حشرات مبتعرفش الإحساس
وادي البرغوت عمال يقرص
يرعى ف جسمي وماسابش مكان
***
وناموس بيزن يون يتن
وانا تحت لحافي نايم ائن
وناموس معرفش بيدخل كيف
جوة وداني
والجسم اهو وارم وماظنوش
هيروق تاني
والناس عايشة ف فلل عمارات
وانا عايش أصحابي الحشرات
وأنام بالليل
أصبح معرفش لبيتي دليل
النمل يشيلني يوديني
علشان ارجع مشواري طويل
واكمني فقير
كل الحشرات عملت جسمي
فايش وفطير
وفطارهم على دمي ولحمي
ومفيش تقدير
لكني مقادرش احاربهم
ودعايا ولا مرة صايبهم
ولا حتى كلامي بيعجبهم
وبيقرفو من ريحة جسمي
ويدوخو تاخدهم وتجيبهم
دايرين يشكوني لكل الناس
بيقولو ميعرفش الإحساس
الميه اهي تحتينا بتنداس
ود ريحته تهجج كل الناس
***
وانا جسمي ياناس
صبح مستوطنة للحشرات
وامتى هيجيلي يوم وهقوم
القالي مكان مفهوش حشرات ؟؟؟
***
لكن يومها عليا هتصعب
عشرة أصحابي وجيراني
أحبابي أهلي وخلاني
مقدرش أسيبهم آه ياني
د العشرة متهونش ياحضرات
إلا على جبان أو ابن حرام
دانا حتى ان جيت
مرة وغنيت
راح اخدهم ويايْ ف شكاير
وأوزعهم على كل الناس
علشان ميجربو عشرتهم
واحلفلكو ان انا حبيتهم
هنا قدامكم ممكن اجيبهم
آدي البرغوت وادي ناموسة
والنملة ف شعري مدسوسة
وكمان عاملة عليا جاسوسة
***
أنا آسف جدا ياصحابي
علشان باشكيكم للإنسان
عشرتكم أحلى من الإنسان
ليلي ونهاري بلاقيكم
من غير ماتكلم واناديكم
ووجودكم دايما ويايا
بيفكرني بظلم الإنسان
الدنيا خلاص فيها ديابة
وفقيرها اتاكل بالنسيان
وبنادي وبقول للإنسان
مستغني انا عنك بالحشرات
مش عايز منك ولا نظرات ولا حنية
ولا دمعة تنزلها عليا
وسلامي إلى كل الحشرات العشرية
وألف سلام
ومقولش سلام ليك ياإنسان
وان قلت سلام انا هبقى جبان
واقابلكم في الحلقة الجاية
وحكاية تانية مسلية
مع باقي حبايبي والخلان