ليالي زمان
ليالي زمان يابوحسيبه
نغرب فيها دنيانا
وننسى الهم بالموال
وعاش الهم جوانا
ليالي زمان ليالي يا ريت
تعود يا صاحبي من تاني
تعود الشله واللمه
واشوف الصحبه قدامي
واشوف الحب ف عيونا
بيبكي من فراق دامي
بيبكي دموع ونار تحرق
قلوب م الفرقه بتعاني
قلوب ف حماده وف أحمد
وعادل وابراهيم ، هاني
وابو زيد صاحب الأبيات
علاء ، صالح ، ربيع ، سامي
وأصحاب ف الحشا ساكنين
وساكتين بس مش ساكتين
ف قلبي لجل فرقتهم
تقطَّع ألف م السكاكين
وبتمنى وبدعي كتير
يا ربي ما يكونوش ناسيين
ليالي زمان
ليالي زمان يابو حسيبه
كانت أيام ما تتعوض
وكنا شباب و مش عارفين
ورانا أسود ما تتروض
وترويضها يا صاحبي عصيب
ولو نجري د أكبر عيب
وإنت يا صاحبي كنت لبيب
ومن يومك وبتخوض
وصاحبك عيبه مدَّلع
ولما تضيق يزوغ يخلع
ولما يسد يتسرع ويتبهدل
يحاول ف الأمور يعدل
تميل تقلب وتتشندل
وصاحبك لاص واهو اتشنكل
يا ريتني منك اتعلمت
اكون راجل
د كان ينفعني من بدري
وف الآجل
وبستناك تجيلي ف يوم
وتحضني .. تفكرني .. بليالي زمان
موضوع: ليالي زمان 
السبت مايو 14, 2011 10:00 pm